Արմինեն երազում էր սեփական գրադարան ունենալու մասին։
Արմինեի համար կրթությունը մասնագիտությունից ավելին էր․ այն կյանքի ուղի էր՝ շարունակաբար կրթվելու, զարգանալու և այդ ճանապարհին ուրիշներին օգնելու գաղափարով։
Արմինե Գրիգորյանը ծնվել է 1989 թվականի մարտի 29-ին Գյումրիում։ Ստացել է բանասիրական կրթություն, սակայն մշտապես ձգտելով նոր գիտելիքների՝ հետագայում շարունակել է ուսումը Գյումրու տեխնոլոգիական կենտրոնում, որտեղ ուսումնասիրել է ծրագրավորում։
Այդ շրջանն էլ դարձավ նրա մասնագիտական ճանապարհի սկիզբը։ Տեխնոլոգիաների նկատմամբ հետաքրքրությունը արագ վերածվեց մասնագիտության, իսկ աշխատասիրությունն ու պատասխանատվությունը նրան դարձրեցին իր ոլորտում առաջատար մասնագետ։
2015 թվականից Արմինեն մասնագիտացել է կառավարման համակարգերի ավտոմատացման ոլորտում։ Նա աշխատել է տարբեր տեխնոլոգիական նախագծերի վրա և մեծ ներդրում է ունեցել Գյումրիում ծնված տեխնոլոգիական ստարտափի զարգացման գործում՝ օգնելով այն հասցնել հանրապետական մասշտաբի։
Արմինեն առանձնանում էր իր աշխատասիրությամբ, պահանջկոտությամբ և մշտապես զարգանալու ցանկությամբ։ Նրա համար կարևոր էր ոչ միայն մասնագիտական աճը, այլ նաև գիտելիքը կիսելը։
Արմինեն վստահելի ընկեր էր, լավ խորհրդատու և մարդ, ում կողքին մարդիկ իրենց ապահով էին զգում։ Նա միշտ պատրաստ էր աջակցել դժվար պահին և ուրախանալ ուրիշների հաջողություններով։
Նրա կյանքի կարևոր արժեքներից էին հայրենասիրությունը, կրթությունը և հասարակությանը օգտակար լինելու ցանկությունը։ Արմինեն ակտիվորեն զբաղվում էր բարեգործությամբ՝ անվճար դասավանդելով և աջակցելով կարիքավոր ընտանիքներին։
Արմինեի մեծ երազանքներից մեկը սեփական գրադարան ունենալն էր՝ մի վայր, որտեղ մարդիկ կարող են կարդալ, սովորել և զարգանալ։
2023 թվականին Արմինեն անժամանակ հեռացավ կյանքից, սակայն նրա երազանքը մնաց։ Արտակ Գևորգյանի նախաձեռնությամբ ստեղծվեց Armineh’s library-ն, որն այսօր ոչ միայն ապրեցնում է Արմինեի անունը, այլև Գյումրիում տարածում է նոր մշակույթ գրքի ու ընթերցանության հանդեպ։
